نئے سال کی مثبت شروعات: پاکستان کی صنعتی ترقی کے باعث معیشت مضبوط بنیادوں پر گامزن
پاکستان کی صنعتی ترقی
نئے سال کا آغاز پاکستان کے لیے معاشی اعتبار سے امید افزا ثابت ہو رہا ہے، جہاں صنعتی ترقی کے نتیجے میں ملکی معیشت بتدریج مگر مستحکم بہتری کی جانب بڑھ رہی ہے۔ تازہ سرکاری اعداد و شمار کے مطابق مالی سال 2025-26 کے پہلے کوارٹر میں مجموعی قومی پیداوار (GDP) میں 3.71 فیصد اضافہ ریکارڈ کیا گیا، جو گزشتہ سال اسی مدت میں حاصل ہونے والی 1.56 فیصد گروتھ کے مقابلے میں نمایاں بہتری کی علامت ہے۔
معاشی ماہرین کے مطابق گزشتہ مالی سال میں معیشت اگرچہ سست رفتاری سے بحالی کے عمل سے گزری، تاہم موجودہ مالی سال کی شروعات ہی دوگنی رفتار سے ترقی کے ساتھ ہوئی ہے، جو حکومتی پالیسیوں اور معاشی نظم و ضبط کا مظہر سمجھی جا رہی ہے۔ یہ پیش رفت اس بات کی نشاندہی کرتی ہے کہ ملکی اکانومی نہ صرف استحکام کی جانب واپس آ چکی ہے بلکہ اب پائیدار ترقی کی بنیادوں پر کھڑی ہو رہی ہے۔
اس ترقی کا سب سے نمایاں اور حوصلہ افزا پہلو صنعتی شعبے کی غیر معمولی کارکردگی ہے۔ اعداد و شمار کے مطابق مالی سال 2025-26 کے پہلے کوارٹر میں صنعتی شعبے کی شرح نمو 9.38 فیصد رہی، جبکہ گزشتہ برس اسی عرصے میں یہ شرح محض 0.12 فیصد تھی۔ ماہرین کے نزدیک صنعتی پیداوار میں یہ واضح اضافہ روزگار کے مواقع، برآمدات میں بہتری اور ملکی پیداوار میں اضافے کا پیش خیمہ ثابت ہو سکتا ہے۔
معاشی تجزیہ کاروں کا کہنا ہے کہ توانائی کی دستیابی میں بہتری، شرح سود میں استحکام، کاروباری اعتماد میں اضافہ اور برآمدی صنعتوں کی بحالی جیسے عوامل نے صنعتی شعبے کو سہارا دیا ہے۔ اگر یہ رجحان برقرار رہا تو آئندہ سہ ماہیوں میں معیشت کو مزید تقویت ملنے کی توقع ہے۔
الحمدللہ، موجودہ اعداد و شمار اس بات کی عکاسی کرتے ہیں کہ پاکستان کی معیشت صرف بحران سے نکل ہی نہیں رہی بلکہ مضبوط بنیادوں کے ساتھ آگے بڑھنے کی سمت میں داخل ہو چکی ہے۔ تاہم ماہرین اس امر پر زور دیتے ہیں کہ اس رفتار کو برقرار رکھنے کے لیے پالیسیوں میں تسلسل، اصلاحات اور سرمایہ کاری کا فروغ ناگزیر ہوگا۔
