مریم نواز ڈٹ گئیں، پنجاب میں غیرمنقولہ جائیداد قانون سے متعلق ہائیکورٹ کے متنازع فیصلے پر ردِعمل
غیرمنقولہ جائیداد قانون پر ہائی کورٹ کے متنازع فیصلہ پر مریم نواز کا ردِعمل:
وزیراعلیٰ پنجاب مریم نواز شریف نے پنجاب پروٹیکشن آف اونرشپ آف غیر منقولہ جائیداد قانون کی معطلی سے متعلق اہم بیان دیتے ہوئے کہا ہے کہ
صوبے میں برسوں اور نسلوں تک چلنے والے جائیداد کے تنازعات کے خاتمے کے لیے ایک تاریخی قانون متعارف کرایا گیا تھا، جس کے تحت پہلی بار ان مقدمات کو 90 دن میں نمٹانے کی واضح حد مقرر کی گئی۔
وزیراعلیٰ مریم نواز نے کہا کہ پنجاب میں جائیداد کے تنازعات ایک سنگین سماجی اور قانونی مسئلہ بن چکے تھے، جس کی وجہ سے لاکھوں شہری برسوں سے عدالتوں اور کچہریوں کے چکر کاٹنے پر مجبور تھے۔ ان کا کہنا تھا کہ یہ قانون ان مظلوم اور متاثرہ خاندانوں کے لیے امید کی کرن تھا جو دہائیوں سے انصاف کے منتظر تھے۔
انہوں نے واضح کیا کہ حکومت پنجاب نے یہ قانون کسی مخصوص طبقے کے فائدے کے لیے نہیں بلکہ عام شہریوں کے تحفظ کے لیے بنایا تھا تاکہ زمینوں اور گھروں پر ناجائز قبضوں، جعلی دستاویزات اور طویل عدالتی کارروائیوں کا خاتمہ ممکن بنایا جا سکے۔
وزیراعلیٰ کا کہنا تھا کہ
“ہم نے برسوں اور دہائیوں کے ستائے ہوئے لاکھوں اہلِ پنجاب کی مدد کے لیے یہ قانون بنایا، تاکہ لوگوں کو بروقت انصاف مل سکے اور ان کی ملکیت محفوظ ہو۔”
مریم نواز نے مزید کہا کہ جائیداد سے متعلق مقدمات نہ صرف افراد بلکہ پورے خاندانوں کی زندگی متاثر کرتے ہیں۔ ایسے تنازعات نسل در نسل منتقل ہو جاتے ہیں اور معاشرتی بگاڑ کا سبب بنتے ہیں۔ اسی تناظر میں حکومت نے فیصلہ کیا تھا کہ ان مقدمات کے لیے ٹائم لائن متعین کی جائے تاکہ انصاف میں تاخیر کا خاتمہ ہو۔
قانونی ماہرین کے مطابق یہ قانون اگر مؤثر انداز میں نافذ رہتا تو پنجاب میں جائیداد کے مقدمات میں نمایاں کمی آ سکتی تھی اور عدالتی نظام پر بوجھ بھی کم ہوتا۔ تاہم قانون کی معطلی کے بعد اس حوالے سے ایک نئی بحث نے جنم لیا ہے۔
وزیراعلیٰ پنجاب نے اس موقع پر یقین دہانی کروائی کہ حکومت عوام کے حقوق کے تحفظ کے لیے پرعزم ہے اور جائیداد کے مسائل کے مستقل حل کے لیے قانونی اور انتظامی اصلاحات کا عمل جاری رکھا جائے گا۔
انہوں نے کہا کہ پنجاب حکومت کا مقصد ایک ایسا نظام قائم کرنا ہے جہاں شہریوں کو بغیر تاخیر، شفاف اور مؤثر انصاف میسر آ سکے، خاص طور پر جائیداد جیسے حساس معاملات میں۔
اپنے گھر کے خواب کی تعبیر: وزیراعلیٰ مریم نواز کا “اپنی چھت اپنا گھر” پروگرام کامیابی سے جاری
