او جی ڈی سی ایل کی کوہاٹ میں نشپا بلاک سےتیل و گیس کی بڑی دریافت، یومیہ 4,100 بیرل تیل اور ایک کروڑ 5 لاکھ مکعب فٹ گیس حاصل ہوگی
آئل اینڈ گیس ڈویلپمنٹ کمپنی لمیٹڈ (او جی ڈی سی ایل) نے خیبر پختونخوا کے ضلع کوہاٹ میں واقع نشپا بلاک میں تیل اور گیس کے بڑے ذخائر دریافت کر لیے ہیں، جسے کمپنی نے قوم کے لیے نئے سال کا بڑا تحفہ قرار دیا ہے۔ اس اہم دریافت سے نہ صرف ملکی توانائی کے شعبے کو تقویت ملے گی بلکہ درآمدی ایندھن پر انحصار کم کرنے میں بھی مدد ملنے کی توقع ہے۔
او جی ڈی سی ایل کے مطابق نشپا بلاک میں واقع براگزئی ایکس کنواں نمبر ون سے یومیہ 4 ہزار 100 بیرل خام تیل اور ایک کروڑ 5 لاکھ مکعب فٹ گیس حاصل ہونے کی توقع ہے۔ کمپنی کے ترجمان نے بتایا کہ یہ کنواں 5 ہزار 170 میٹر گہرائی تک کھودا گیا، جہاں سے تجارتی بنیادوں پر قابلِ ذکر مقدار میں ہائیڈروکاربن دریافت ہوئے ہیں۔
کمپنی حکام کا کہنا ہے کہ یہ دریافت پاکستان کے توانائی بحران پر قابو پانے کی جانب ایک اہم پیش رفت ہے۔ اس منصوبے سے مقامی سطح پر تیل و گیس کی پیداوار میں اضافہ ہوگا، جس سے زرمبادلہ کی بچت اور توانائی کے شعبے میں خود انحصاری کو فروغ ملے گا۔ ماہرین کے مطابق اس دریافت سے قومی گرڈ کو اضافی گیس فراہم کی جا سکے گی، جو صنعتی اور گھریلو صارفین کے لیے فائدہ مند ثابت ہوگی۔
نشپا بلاک میں شراکت داری کے حوالے سے او جی ڈی سی ایل بطور آپریٹر 65 فیصد حصص رکھتی ہے، جبکہ پاکستان پیٹرولیم لمیٹڈ (پی پی ایل) 30 فیصد اور گورنمنٹ ہولڈنگز پرائیویٹ لمیٹڈ (جی ایچ پی ایل) 5 فیصد کی شراکت دار ہے۔ توانائی کے شعبے سے وابستہ ماہرین کا کہنا ہے کہ اس طرح کی دریافتیں پاکستان کے تیل و گیس سیکٹر میں سرمایہ کاری کو مزید متوجہ کریں گی۔
یاد رہے کہ او جی ڈی سی ایل ماضی میں بھی ملک کے مختلف علاقوں میں تیل و گیس کی کامیاب دریافتیں کر چکی ہے، اور حالیہ پیش رفت اس کی تکنیکی مہارت اور تلاش کے شعبے میں مضبوط صلاحیت کا مظہر ہے۔
ملک میں سونے کی قیمت میں تاریخی کمی، فی تولہ سونا 10 ہزار 700 روپے سستا ہو گیا
