مریم نواز غیرمنصفانہ فیصلے کےخلاف ڈٹ گئیں، غیر منقولہ جائیداد آرڈیننس 2025 کی معطلی پر وزیراعلیٰ مریم نواز کا دوٹوک مؤقف
غیرمنقولہ جائیداد آرڈیننس 2025 پر مریم نواز کا سخت موقف:
وزیراعلیٰ پنجاب مریم نواز شریف نے پنجاب غیرمنقولہ جائیداد آرڈیننس 2025 کی معطلی پر سخت ردعمل دیتے ہوئے کہا ہے کہ قانون سازی کرنا صوبائی اسمبلی کا آئینی اور قانونی حق ہے، جسے کسی صورت روکا نہیں جا سکتا۔
وزیراعلیٰ مریم نواز نے واضح کیا کہ اس آرڈیننس کی معطلی سے نقصان ان کی ذات کو نہیں بلکہ ان لاکھوں غریب، مسکین، بے کس، بیواؤں اور مظلوم شہریوں کو ہو گا جو برسوں سے قبضہ مافیا اور لینڈ مافیا کے ظلم کا شکار چلے آ رہے تھے اور جنہیں اس قانون کے ذریعے پہلی بار فوری انصاف کی امید ملی تھی۔
انہوں نے کہا کہ یہ قانون کسی فردِ واحد یا سیاسی فائدے کے لیے نہیں بنایا گیا تھا بلکہ اس کا واحد مقصد ان مظلوم شہریوں کو تحفظ فراہم کرنا تھا جن کی زمینوں اور گھروں پر طاقتور مافیا ناجائز قبضے کر لیتا ہے اور متاثرین دہائیوں تک عدالتوں میں خوار ہوتے رہتے ہیں۔
وزیراعلیٰ کا کہنا تھا:
“یہ قانون مریم نواز کے فائدے کے لیے نہیں تھا، نہ ہی اس کی معطلی سے ہماری ذات کو کوئی نقصان پہنچا ہے، لیکن اس فیصلے سے ان عوام کو شدید نقصان پہنچے گا جو قبضہ اور لینڈ مافیا کے ستائے ہوئے ہیں۔”
انہوں نے افسوس کا اظہار کرتے ہوئے کہا کہ اس آرڈیننس کے تحت غریب اور مظلوم طبقے کو پہلی بار یہ امید بندھی تھی کہ انہیں برسوں کے بجائے چند مہینوں میں انصاف مل سکے گا، مگر اب اس قانون کی معطلی سے ان کی وہ امید بھی ٹوٹتی دکھائی دے رہی ہے۔
مریم نواز شریف نے مزید کہا کہ انصاف میں تاخیر دراصل انصاف سے انکار کے مترادف ہے، اور جب غریب اور مظلوم کی بندھنے والی آس ٹوٹتی ہے تو اس کے اثرات پورے معاشرے پر مرتب ہوتے ہیں۔ ان کے مطابق قبضہ مافیا کے خلاف مؤثر قانون سازی ہی واحد راستہ ہے جس سے عام شہری کے جان و مال کا تحفظ ممکن بنایا جا سکتا ہے۔
سیاسی و قانونی ماہرین کا کہنا ہے کہ یہ آرڈیننس اگر مکمل طور پر نافذ العمل رہتا تو پنجاب میں جائیداد سے متعلق مقدمات، ناجائز قبضوں اور زمینوں کے تنازعات میں نمایاں کمی آ سکتی تھی۔ تاہم اس کی معطلی نے ایک بار پھر غریب طبقے کو غیر یقینی صورتحال سے دوچار کر دیا ہے۔
وزیراعلیٰ پنجاب نے اس عزم کا اعادہ کیا کہ حکومت مظلوم شہریوں کے حقوق کے تحفظ سے دستبردار نہیں ہو گی اور انصاف کی فراہمی کے لیے ہر آئینی اور قانونی راستہ اختیار کیا جائے گا۔
مریم نواز ڈٹ گئیں، پنجاب میں غیرمنقولہ جائیداد قانون سے متعلق ہائیکورٹ کے متنازع فیصلے پر ردِعمل
