پاکستان ریلویز کی تاریخ ساز کامیابی، سالانہ آمدن 100ارب روپے کاہندسہ عبور کرنے کے قریب
وفاقی وزیر ریلوے حنیف عباسی نے پاکستان ریلویز میں مسافروں کی حفاظت اور نظام کو جدید بنانے کے لیے ٹرینوں میں کیمرے لگانے کا اہم فیصلہ کر لیا ہے۔ اس اقدام کا مقصد ٹرینوں میں سیکیورٹی کو بہتر بنانا، جرائم کی روک تھام اور مسافروں کو محفوظ سفر کی سہولت فراہم کرنا ہے۔
وزیر ریلوے کا کہنا ہے کہ پاکستان ریلویز مسلسل ترقی کی راہ پر گامزن ہے اور رواں مالی سال کے دوران ادارے نے 93 ارب روپے سے زائد ریونیو حاصل کر لیا ہے، جو ایک بڑی کامیابی ہے۔ انہوں نے بتایا کہ مالی سال 2025-26 کی پہلی ششماہی میں پاکستان ریلویز کی آمدن 50 ارب روپے تک پہنچنے کی توقع ہے جبکہ مالی سال کے اختتام پر پاکستان ریلویز تاریخ میں پہلی بار ایک کھرب روپے آمدن کا سنگِ میل عبور کر لے گا۔
حنیف عباسی نے کہا کہ ادارے میں شفافیت اور نظم و ضبط کو بہتر بنانے کے لیے متعدد اصلاحات متعارف کروائی گئی ہیں۔ انہوں نے بتایا کہ سیفٹی ڈیپارٹمنٹ کو باقاعدہ ڈائریکٹوریٹ میں تبدیل کر دیا گیا ہے، جس کے مثبت نتائج سامنے آ رہے ہیں۔ سیفٹی ڈائریکٹوریٹ کے قیام کے بعد ریلوے حادثات میں نمایاں کمی واقع ہوئی ہے اور حادثات کی شرح 0.09 فیصد سے کم ہو کر 0.04 فیصد تک آ گئی ہے۔
وزیر ریلوے کے مطابق، عملے کی حاضری کو بھی مکمل طور پر کمپیوٹرائزڈ کر دیا گیا ہے تاکہ وقت کی پابندی، شفافیت اور کارکردگی میں بہتری لائی جا سکے۔ اس اقدام سے نہ صرف حاضری کے نظام میں بہتری آئی ہے بلکہ غیر حاضری اور بے ضابطگیوں میں بھی نمایاں کمی ہوئی ہے۔
حنیف عباسی نے مزید بتایا کہ پاکستان ریلویز نے صرف 8 ماہ کے قلیل عرصے میں ٹرینوں کے 8 ریکس کو اپ گریڈ کیا ہے، جو ماضی میں ایک مشکل ہدف سمجھا جاتا تھا۔ اپ گریڈ کی جانے والی ٹرینوں میں شالیمار ایکسپریس، پاک بزنس ایکسپریس، لاثانی ایکسپریس اور فیض احمد فیض ایکسپریس شامل ہیں، جنہیں جدید سہولیات سے آراستہ کیا گیا ہے۔
وزیر ریلوے نے اعلان کیا کہ دسمبر 2026 تک پاکستان ریلویز کی تمام ٹرینیں اپ گریڈ کر دی جائیں گی۔ اس منصوبے کے تحت ٹرینوں میں جدید نشستیں، بہتر صفائی، جدید ٹوائلٹس، وائی فائی، کیٹرنگ اور سیکیورٹی کے جدید انتظامات شامل ہوں گے۔
ان کا کہنا تھا کہ حکومت کا ہدف پاکستان ریلویز کو ایک منافع بخش، محفوظ اور جدید ادارہ بنانا ہے تاکہ عوام کو بہتر سفری سہولیات میسر آ سکیں اور ملک کے ٹرانسپورٹ نظام میں بہتری آئے۔
مسافروں اور عوامی حلقوں نے وزیر ریلوے کے اقدامات کو خوش آئند قرار دیتے ہوئے کہا ہے کہ ٹرینوں میں کیمرے لگانے اور سیکیورٹی کے نظام کو بہتر بنانے سے سفر مزید محفوظ ہو جائے گا جبکہ آمدن میں اضافے سے قومی ادارہ مضبوط ہوگا۔
