پاکستان اسٹیل مل بحالی پروگرام

وزیراعظم کے معاون خصوصی برائے صنعت و پیداوار ہارون اختر نے پاکستان اسٹیل ملز بحالی کا باضابطہ اعلان کرتے ہوئے کہا ہے کہ حکومت ملک کے صنعتی شعبے کو دوبارہ فعال بنانے کے لیے سنجیدہ اقدامات کر رہی ہے۔

اسلام آباد میں میڈیا بریفنگ کے دوران ہارون اختر نے بتایا کہ پاکستان اسٹیل ملز کی بحالی کے لیے صرف روس ہی نہیں بلکہ چار مختلف ملکی و غیرملکی پارٹیز دلچسپی رکھتی ہیں۔ ان کا کہنا تھا کہ حکومت شفاف اور بہترین شرائط پر سرمایہ کاری کو یقینی بنائے گی تاکہ قومی اثاثے کو دوبارہ منافع بخش بنایا جا سکے۔

انہوں نے مزید کہا کہ حکومت جلد ہی نیو انرجی وہیکل (NEV) پالیسی متعارف کرانے جا رہی ہے، جس کا مقصد ماحول دوست ٹرانسپورٹ کو فروغ دینا اور صنعتی ترقی کو نئی سمت دینا ہے۔ اس کے ساتھ ساتھ ویکسین پالیسی اور سولر انرجی پالیسی بھی جلد لائی جائیں گی۔

ہارون اختر کا کہنا تھا کہ حکومت پیداواری شعبے کی ترقی پر خصوصی توجہ دے رہی ہے اور اس سلسلے میں مقامی صنعت کو فروغ دینے کے لیے اقدامات کیے جا رہے ہیں۔ انہوں نے بتایا کہ ہوم اپلائنسز کی مقامی سطح پر تیاری پر بھی غور کیا جا رہا ہے تاکہ درآمدات میں کمی اور روزگار کے مواقع پیدا کیے جا سکیں۔

ماہرین کے مطابق اگر پاکستان اسٹیل ملز کی بحالی کا منصوبہ کامیاب ہوتا ہے تو یہ نہ صرف صنعتی پیداوار میں اضافہ کرے گا بلکہ ہزاروں افراد کے لیے روزگار کے نئے مواقع بھی پیدا ہوں گے۔